1 - Agdadanon dagiti Oligarka iti Padaya

Subject: 1 - Agdadanon dagiti Oligarka iti Padaya Wed Mar 11, 2009 4:30 pm

1 – AGDADANON DAGITI OLIGARKA ITI PADAYA

ALDAW TI DOMINGO. PETSA 26 TI MARSO. TAWEN 1989. Alas otso ti rabii. Lenned ti bulan ket ad-adda a timpuar ti kinarayray dagiti riniwriw a bituen iti nasipnget a tangatang. Apagapaman ti palayupoy ti angin. Ipalpalnaadna ti kinapintas ti panawen nupay mangrugin a marikna ti dagemsem ken dagaang nga idateng ti igaaw.

Naraniag dagiti pimmalasio a pagtaengan dagiti Oligarka—dagiti multimilionario a pulitiko, militar, ken negosiante a mangtengtengngel iti ekonomia ti Filipinas—iti Forbes Park iti Makati. Ngem dida kabaelan a daeran ti kinaraniag iti aglawlaw ti mansion dagiti Agcaoili.

Nagangtan dagiti dadakkel a floodlights a naipalawlaw iti nalawa nga inaladan ti mansion. Dangdanggayan dagiti gumilang-gilang nga amarilio, asul, nalabaga, berde ken ube a bombilia ti naparagsit a tokar ti Rhythm and Blues Band. Adda iti kanigid a suli ti naarkosan nga entablado dagiti pito nga agtutubo a kamkameng ti banda. Iti sabali a bangir ti nalawa nga entablado ti yan dagiti musikero ti Philippine Philharmonic Orchestra. Ur-urayenda ti batangda nga agtokar.

Makumikom dagiti nakauniporme a serbidora ti China Pearl, de-primera klase a restauran iti Makati, nga agipuni kadagiti agkakangina ken agkakaimas a sagana kadagiti ginasut a lamisaan. Di met makatalna dagiti weyter ti Han Court Winery iti Greenhills nga agtempla ken agiwaras kadagiti imported nga arak. Adda Dom Perignon, Louis XIV, Remy Martin, Chivas Regal, J & B, Johnie Walker, Fundador, Carlos I, Hennessy VSOP, Highland Queen ken dadduma pay. Adda met serbesa a Budweiser, Heineken, ken San Miguel Beer in cans a para kadagiti madi iti arak.

Pudno a padaya para kadagiti oligarka ti insagana dagiti agasawa a Don Dionysius II ken Donia Preciosa Agcaoili. Para kadagiti didiosen a babassit. Dagiti didiosen iti pulitika, pinansia, ekonomia, edukasion, kultura, ken iti alta sosiedad. Dagiti kamkameng ti Manila’s 400, dagiti kasasaliwanwanan a pamilia iti Kamanilaan. Dimmar-ay iti nabaknang a padaya dagiti rich and famous, dagiti nabaknang ngem di unay nalatak, dagiti nalatak ngem di unay nabaknang, ken dagiti kontrobersial ken di unay nalatak a tattao.

Awan aridenggan iti aglawlaw. Makidindinnaer iti kinasarangsang ti katkatawa dagiti agraragsak ti kalangiking dagiti kubiertos ken kopita ti arak. Di met agsarday ti ariwawa dagiti kumakanta, kasta met dagiti instrumentoda. Lumanipak ti sipsipat dagiti agtutubo nga aglagto-agwerret-agkinni-agpaseksi a mangkumkumpas iti Lambada.

Dua a pasken ti nakaangayan ti nadaeg a parambak. Umuna ti panagkasangay dagiti singin a Dioni Ritzi ken Diona Ritza Agcaoili. Maikadua ti pannakadanon ti maikatlo nga anibersario ti Daily Frontliner, ti aginaldaw a pagiwarnak ti Frontliner Publishing Company. Maysa kadagiti sangapulo ket tallo a kompania a tartarawidwidan ti Frontliner Corporation. Kabukbukodan dagiti Agcaoili ti pribado a korporasion.

Agsupadi ti langa dagiti singin. Fraternal twins. Tinawid ni Dioni Ritzi ti Kimmastila a panagruprupa dagiti Agcaoili. Immala met ni Diona Ritza iti inana a mestisa Intsik-Aleman.

Saan pay a maymaysa nga aldaw ti pannakaipasngayda. Sangapulo a minutos sakbay ti panagpatingga ti Marso 26 ken ni Dioni Ritzi. Sangapulo met a minutos kalpasan ti alas dose ti parbangon—Marso 27—ken ni Diona Ritza. Normal ti panangipasngay ni Donia Preciosa kadagiti di-agkalanglanga a singinna.

Maysa a banag ti pagkaarngian dagiti fraternal twins: agpadpadada a higante! Iti katayagna nga innem a kadapan ken uppat a pulgada, nalaka a sapulen ni Dioni Ritzi iti pagguummongan dagiti tattao. Tumpuar met ti kinatayag ni Diona Ritza iti sadinoman a papananna. Iti Filipinas, a kaaduan kadagiti babbai ti apagsurok la a lima a kadapan, naisalsalumina ti innem a kadapan a kinatayag ni Diona Ritza. Uray maitibok kadagiti lallaki, lumtaw ti kinahigante ti napintas a balasang.

Tinawid dagiti singin ti kinatayag dagiti dadakkelda. Six-two ni Don Dionysius II nga amada ken five-eleven met ni Donia Preciosa. Agtayag pay iti innem a kadapan ken tallo a pulgada ti kakaisuna ngem pimmusayen a kabsat ni Don Dionysius II. Ni Diomedes. Wenno Uncle Medy.

Agduyos pay iti dinnayo dagiti singin. Paborito ni Dioni Ritzi ti polo, car racing, scuba diving, windsurfing, spelunking, golf, tennis ken basketbol. Kaay-ayo met ni Diona Ritza ti swimming, bowling, tennis ken basketbol. Nalaing pay nga agkabalio. Champion equestrienne idi agad-adal pay laeng iti International School iti Makati. Third-dan blackbelter iti judo-karate ti baro idinto ta first-dan ti balasang.

Tallo a tawen metten ti pagiwarnak a Daily Frontliner. Inyussuat ni Don Dionysius II ti aginaldaw a diario makabulan kalpasan ti pannakairusat ti Baro a Dispensasion. Ti baro a turay a ginubbuay ti People Power iti EDSA.

Nabayagen a publisista ti baknang a lakay. Ngem aglinawas a magasin, komiks ken song hits ti immuna a tinarawidwidan ti Frontliner Publishing Company.

"Dad, why don’t we put up our own paper here in Manila?” insingasing idi ni Dioni Ritzi. "Tapno maipakatmi ken ni Diona Ritza ti innalami a masscom ken journalism iti Harvard. He-he-he!”

"Wen nga agpayso, Dad,” insarurong ni Diona Ritza. "So that Dioni Ritzi’s talents and mine won’t hibernate. Hi-hi-hi!”

"Great idea, Pa!" Nagtung-ed ni Donia Preciosa. "Sold ako sa binabalak ng kambal natin.”

Immannugot ni Don Dionysius II iti singasing dagiti singin. Narugian ti pannakaimaldit ti Daily Frontliner. Singkuenta mil a kopia kada aldaw ti nangrugian ti pagiwarnak. Puro kattiliw dagiti innala ni Dioni Ritzi a kaduada ken ni Diona Ritza a mangiggem iti diario. Panay a greenhorn. Di pay naasa dagiti plumada. Nangudel. Ngem natennebda ketdi a kas kamkameng ti College Editors Guild of the Philippines. Premiadoda kadagiti nailian a pasalip iti panagsurat iti damdamag, editorial, salaysay ken feature stories.

Kinagiddanda a dimmakkel ti diario. Iti kaudian a survey nga inwayat ti Philippine Survey and Research Center, iti kadagupan ti aganay a tallopulo a diario iti Metro Manila, maysa ti Daily Frontliner kadagiti lima a kalalatakan a pagiwarnak a paggugusto a gatangen dagiti agbasbasa.

Nangyussuatda pay iti provincial papers kadagiti dadakkel a siudad ken probinsia iti pagilian. Nagbalin a duapulo ti dati a sangadosena a magasin nga imalmaldit ti Frontliner Publishing Company. Nadoble met ti dati a duapulo nga aglinawas a komiksda. Ket rinugianda ti nagimaldit iti mamindua daras iti makalawas iti sumagmamano a komiksda. Kabimbinnalubaldan dagiti komiks ken magasin ti Graphic Arts ken Atlas Publishing. Ken dumakdakkel ti sirkulasion dagiti publikasionda iti ballasiw taaw!

AWAN MASAO DAGITI SANGSANGAILI iti kinagarbo dagiti dua a pasken iti nalawa a hardin dagiti Agcaoili. Agtultuloy nga aglayus ti makan ken mainum. No mabannog dagiti agkabannuag a mangdanggay kadagiti kabaruan a kanta ti Rhythm and Blues Band, sumublat dagiti nataengan a mangdanggay kadagiti naimnas a sonata ti Philippine Philharmonic Orchestra.

Iti maysa a lamisaan, naimas ti tungtongan da Senador Honrado Delgado, Diputado Ricarte Olvidarse, Kongresman Fernan Zialcita, ken Heneral Guillermo Guillas. Isuda ti kasingedan a gagayyem da Don Dionysius II ken Donia Preciosa. Agkakaarrubada iti Forbes Park.

"Kompadre,” pinagtimkan ti senador ni Hen. Guillas, "agkakamakam ti panangbanat ti media iti military ita. Tunggal adda krimen a mapasamak, a military man is almost always involved. Har-har-har!”

"The hell!" Nagtabbaaw ti heneral. "Gapu lang iti sumagmamano a rinuker a soldado—dagiti punyeta a soldakes!—the whole military image is tainted! But we belong to the same boat, Panyero, he-he-he! Agsasaruno met dagiti eskandalo iti Kamara de Representante ken iti Senado. Hak-hak-hak!"

Iti sabali a lamisaan, agdidinnaeg iti kinarimat ken kinangina dagiti alahas ken aruaten da Mrs. Dolly Delgado, Mrs. Olga Olvidarse, Mrs. Clarinda Zialcita ken Mrs. Gloria Guillas. Pamaktenen dagiti uppat a matrona. Ngem adut’ ilugesda a tinedier iti panagtigtignay ken panagar-aruat. Abus ta agkakaarrubada ken agpapagayam dagiti assawada, agpapadada pay iti pagduyosan: dagiti agkabannuag ken agkakapogi a lallaki. Rinabii a kutukutoda kadagiti gay bars, discohouses ken class establishments. Inton agsisinada, saggaysadan iti inaklilian a macho dancer, midnight cowboy, call boy wenno male prosti.

Sangkabigbig dagiti uppat a matrona dagiti pito nga agtutubo iti asidegda. Dida maitudo no asino ti kataeran kadagiti lallaki. Agkakaguapoda amin. Awan giddiatda kadagiti artista iti telebision ken pelikula.

Ti grupo dagiti Golden Guys ti sangkakita dagiti babbaket. Da Dario Omar Velasco, Edgar Villahermosa, Glenn Palos, Benjie Alvarez, Rommel Castillo, Dionell Jacinto ken Rainier Tolosa. Kaarrubada ni Dioni Ritzi iti Frontliner Garden Condominium-5 iti Makati a pagnanaedanda. Dua a tawenen a kapulpulapolda ni Dioni Ritzi. Ngem damoda ti makastrek iti pagtaengan ti baro iti Forbes. Dida impagarup a kastat’ kinabaknang ti pamilia ni Dioni Ritzi.

Kasangsango dagiti Golden Guys ni Dominique Dellosa, ti panglakayen a butiog a bakla a manedier ti Megastar Saloon and Fitness Center. Agpapaay dagiti Golden Guys a kas health instructors iti dakkel ken sikat a beauty parlor ken gymnasium iti Makati. Adda iti maikadua a kadsaaran ti salon ti nalatak ken kabaruanan a Megastar Disco a paborito a hangout dagiti artista, junior executives ken babaknang.

Mayat met ti saritaan dagiti pito a polo-playing partners ni Dioni Ritzi iti sabali a lamisaan. Da Benjo Zobel, Joey Ayala, Jeff Yabut, Jett Cojuangco, Jorell Montelibano, Dondi Locsin, ken Ding Gonzales. Kinaadalan ni Dioni Ritzi dagiti pito iti International School. Ngem nagsisinada idi agkolehiodan. Adda napan idiay London, Paris ken iti Estados Unidos.

Agpapada nga agiwarwarnak dagiti kasarsarita ni Don Chino dela Rama, publisista ti Manila Daily News, iti sabali pay a lamisaan. Nasinged ti panagpagayam da Don Chino ken Don Dionysius II nupay napinget ti panagbalubal dagiti diarioda. Kasangsango ni Don Chino da Crystal Gayle Madrigal, Voltaire Beltran, Chezka Montemayor, Rey Wylan Piniera ken Czarina Gorospe.

Executive editor ni Crystal Gayle idinto ta entertainment editor met ni Chezka iti Manila Daily News. Agpadpada nga editor iti Daily Frontliner da Voltaire ken Rey Wylan. Ni Czarina, dati a journalist, ti executive secretary ni Dioni Ritzi.

Nadekket nga aggayyem da Crystal Gayle ken Diona Ritza. Nagam-ammoda iti Karateka Studio iti Makati a pagsansanayanda iti judo-karate. Ti panagpadada a six-footer ti immuna a namagassideg kadakuada. Nasemento ti panagpagayamda iti pannakatakuatda a parehoda nga agiwarwarnak. Kasta pay kadagiti pagduyosan ken kagurgura.

Nawedwed ti rikna ni Crystal Gayle a timmabuno iti pasken dagiti Agcaoili. Mahilig met ketdi iti sosialan. Ngem umalumiim a maidendenna kadagiti Oligarka.

"C’mon, Crystal Gayle, do come to our party," inyunay-unay kenkuana ni Diona Ritza. "Kayatko a ma-meetmo ti kasinginko. He’s a carbon copy of Mark Harmon, you know. Hi-hi-hi!”

Interesado a makaam-ammo iti kasingin ti gayyemna. Nabayagen nga agkitkitada ken ni Diona Ritza ngem dina impagarup nga adda kasingin ti balasang. Isu nga uray adda panagwedwedna ket timmabuno iti pasken.

Iti maysa pay a lamisaan, maipapan iti demokrasia, sosialismo, komunismo, human rights, liberation theology, ken wholistic salvation ti pagsasaritaan da Obispo Progreso Sibayan, Pastor Reinhard Bumanglag, Raisa dela Rama ken dua a madre. Simmina ti obispo iti Iglesia Filipina Independiente ket nangbangon iti bukodna a sekta. Konektado iti United Church of Christ in the Philippines (UCCP) ti pastor. Bugbugtong nga anak ni Don Chino ni Raisa. Isuda a tallo ti dadaulo ti Clergy-Laity Formation Action a binulan a mangang-angay iti seminar para kadagiti tattao ti Simbaan. Kabinbinnuligda dagiti dua a madre a kamkameng ti Simbaan Katoliko.

Kabayatanna, aglalanglang da Jingo Delgado, Renee Olvidarse, Kapitan Andrei Polendey, Jandy, Joel, Junjun ken Junar iti sabali a lamisaan. Anak ni Sen. Delgado ni Jingo idinto ta unica hija ni Diputado Olvidarse ni Renee. Alalay ni Hen. Guillas ni Kap. Polendey. Ket pasurot ni Jingo da Jandy ken kakaduana.

Ni Renee ti agdama a babai iti biag ni Dioni Ritzi nupay di makuna nga agayan-ayatda. Umdasen a kasapulanda ti maysa ken maysa no makalagipda. Adun ti arak a nainum ti balasang. Nasakit ti nakemna. No di pinagunian dagiti dadakkelna itay agsagsaganada a tumabuno iti parambak, dina naammuan a kasangay ni Dioni Ritzi.

Sabagay, kaano la a nagsinningedda ken ni Dioni Ritzi. Isu pay ketdi ti nangipamuspusan tapno aginnassidegda iti baro. Nem uray kasta ti napasamak, nasken a pinakaammuan ni Dioni Ritzi! Hah! Tinaoganna manen iti Dom Perignon ti kopitana ket pinadasna a lemmesen ti sakit ti nakemna iti arak.

Immasideg da Don Dionysius II ken Donia Preciosa iti lamisaan dagiti kasingedan a papagayam ken kakaarrubada.

"Panyero," inyangad ni Diputado Olvidarse ti rupana ket inisemanna ni Don Dionysius II, "it’s now nine in the evening. Diak met la makita dagitay singinen?”

Tinaldiapan ti don ti Rolex a relona a nabudian iti diamante. Agpayso nga alas nueben ti rabii. "Ah, they’re probably along the way right now, Amigo," insungbatna.

"The twins took part in the Easter cantata How Great Thou Art! at the Ellinwood Church, Kompadre,” insaruno ni Donia Preciosa. “No di gapu iti pasken ditoy ita, addakam koma amin idiay Malate. Hi-hi-hi!”

Timmaliaw ni Diputado Zialcita iti naraniag a ruangan. Nakitana nga apagisu a sumrek da Dioni Ritzi ken Diona Ritza. "Here come the twins!” Intudona dagiti sumungsungad.

Naggigiddanda a timmaliaw iti ridaw. Dagus a sineniasan ni Don Dionysius II ti maestro ti Philippine Philharmonic Orchestra a tinulaganna iti nasapsapa a gundaway. Pinasardeng ti maestro ti panagtokar ti orkestra, sana innala ti mikropono.

"Ladies and gentlemen,” kinunana, "here come the king and queen of tonight’s twin affair… Dioni Ritzi and Diona Ritza Agcaoili!”

Tinokar ti orkestra ti Happy Birthday. Sangsangkamaysa dagiti tattao a timmakder. Dinanggayanda ti orkestra. Sumagmamano kadakuada ti nangkablaaw kadagiti agkasangay

- See Chapter 2 -

» 4a - Numero Trese, Suerte dagiti Agcaoili
» 4b - Numero Trese, Suerte dagiti Agcaoili
» 2 - Ti Suerte dagiti "Fraternal Twins"